У Мінску затрымалі двух студэнтаў каледжа, якія жорстка збілі суседа па інтэрнаце. Пра гэта паведаміў набліжаны да ГУБАЗіК тэлеграм-канал. Тамсама апублікавалі і відэа збіцця.
На запісе (ролік ёсць у рэдакцыі, але мы яго не публікуем з этычных меркаванняў) відаць, як малады чалавек наносіць удары рукамі і нагамі іншаму юнаку. Ахвяра нападу ў гэты час сядзіць на ложку і затуляе галаву рукамі. У роліку чуваць жаночы плач, а таксама словы:
— Ну ўсё, Дзім, прабач, калі ласка. Малю цябе, даруй.
Пасля збіцця пацярпелага папярэдзілі, што «наступным разам будзе горш».
— А калі паспрабуеш нешта напісаць ці паскардзіцца, то ты жывым не сыдзеш з гэтай Беларусі, — сказалі юнаку, які нерухома ляжаў на ложку.
Прапагандысцкія рэсурсы паведамілі, што канфлікт узнік праз тое, што пацярпелы ўзяў у хлопцаў, якія напалі на яго, «трохі цукру».
Пасля таго як ролік з катаваннем апублікавалі ў сеціве, набліжаны да ГУБАЗіК тэлеграм-канал расказаў пра затрыманне двух чалавек, якія «ўвесь час катавалі і прыніжалі свайго суседа».
У дачыненні да іх распачалі крымінальную справу за хуліганства. У «пакаяльным» відэа адзін з юнакоў растлумачыў, што збіў суседа, бо «моцна разгарачыўся».
Чытайце таксама
