Буйнога віцебскага дэвелапера затрымалі па падазрэнні ва ўхіленні ад выплаты падаткаў, паведамляе прэс-служба Камітэта дзяржкантролю.
Падазраваны восем гадоў займаўся арэндай камерцыйнай нерухомасці. Ва ўласнасці яго сям'і знаходзіцца больш за 65 аб’ектаў, у тым ліку буйны гандлёвы цэнтр, адзін з рынкаў горада, складскія памяшканні.
Паводле версіі КДК, з мэтай ухілення ад выплаты падаткаў «галава сямейства, зарэгістраваны ў якасці індывідуальнага прадпрымальніка, арганізаваў рэгістрацыю яшчэ шасці ўзаемазалежных і падкантрольных суб’ектаў гаспадарання, якія займаліся тым самым відам дзейнасці, пры гэтым выкарыстоўвалі спецыяльны рэжым падаткаабкладання».
«Паміж гэтымі суб’ектамі гаспадарання бізнесовец штучна размеркаваў гандлёвыя аб’екты і выручку, якая выходзіла ад іх здавання ў арэнду. Фінансавай міліцыяй быў высветлены цэлы шэраг прыкмет, якія паказваюць на наяўнасць супрацьпраўнай схемы мінімізацыі падаткаў: кампаніі вялі агульны бізнес, кіраванне іх дзейнасцю фактычна ажыццяўлялася адной асобай, офісныя памяшканні ўсіх суб’ектаў гаспадарання знаходзіліся па адным юрыдычным адрасе і іншае», — паведамілі ў ведамстве.
У КДК падкрэслілі, што ў выніку неабгрунтаванага выкарыстання льготнага рэжыму падаткаабкладання бізнесовец ухіліўся ад выплаты падаткаў на агульную суму не менш чым 2,5 млн рублёў.
У дачыненні да яго і яшчэ чатырох чалавек распачатая крымінальная справа. Праведзеныя восем ператрусаў, арыштаваныя 65 аб’ектаў нерухомасці падазраваных агульным коштам 94,8 млн рублёў.
«У цяперашні час падазраваныя па крымінальнай справе даюць прызнальныя паказанні. Прымаюцца меры па кампенсацыі нанесенай шкоды. У добраахвотным парадку імі пералічана ў бюджэт 330 тысяч рублёў», — дадалі ў КДК.
Чытайце таксама
