Украіна паведамляе пра праблемы праціўніка з лагістыкай і скаргі вайскоўцаў з Крыма. Расія традыцыйна дакладвае пра страты ўкраінскай арміі. Брытанская разведка звярнула ўвагу на расійскія ваенныя шары над Украінай, Інстытут вывучэння вайны — на пагрозу атамным электрастанцыям. Расказваем пра галоўнае са зводак штабоў і высноваў экспертаў на 361-ы дзень вайны ва Украіне.
Генштаб УСУ: праблемы з лагістыкай і скаргі вайскоўцаў у Крыме
За суткі Расія нанесла чатыры авіяцыйныя і 15 ракетных удараў, большасць з іх — па цывільнай інфраструктуры Хмяльніцкай, Днепрапятроўскай, Данецкай і Херсонскай абласцей. Таксама праціўнік здзейсніў звыш 50 абстрэлаў рэактыўнымі сістэмамі залпавага агню, паведамляе Генштаб УСУ.
Асноўныя намаганні Расіі сканцэнтраваныя на наступе на Купянскім, Ліманскім, Бахмуцкім, Аўдзійскім і Шахцёрскім напрамках.
За мінулыя суткі падраздзяленні УСУ адбілі атакі расіян на Харкаўшчыне і Данеччыне. Працягваліся абстрэлы на гэтых і іншых напрамках.
У Расіі паўсталі праблемы з лагістыкай падчам забяспечання сваіх падраздзяленняў. Зенітна-ракетныя комплексы даводзіцца адпраўляць на вытворчыя прадпрыемствы ў Расію. Прычына — у заўчасным выхадзе з ладу мадэрнізаваных зенітных ракетных комплексаў С-300, немагчымасці аператыўна дастаўляць баявыя камплектавальнікі і праводзіць рэгулярнае абслугоўванне тэхнікі ў баявых умовах.
У Крыме сваякі мабілізаваных масава звяртаюцца ў Мінабароны РФ з прычыны парушэння правоў вайскоўцаў. Асноўныя скаргі: адсутнасць ратацыі і адпачынкаў больш за шэсць месяцаў і адсутнасць перспектывы на найбліжэйшыя два-тры месяцы; кепскае харчаванне і санітарныя ўмовы, праз што сваякі вымушаныя пастаянна адпраўляць ім прадукты і асабістыя рэчы; факты хабару — афіцэры прапануюць шарагоўцам і сяржантам кароткатэрміновыя канікулы (фактычна адпачынкі) за хабар у 1000 даляраў. Мінабароны РФ не рэагуе на звароты грамадзян.
Авіяцыя УСУ за суткі нанесла шэсць удараў па раёнах канцэнтрацыі асабовага складу і ваеннай тэхнікі Расіі.
Сілы СПА за суткі збілі дзве крылатыя ракеты тыпу «Калібр», а падраздзяленні ракетных войскаў і артылерыі нанеслі ўдары па адным раёне канцэнтрацыі жывой сілы праціўніка.
Мінабароны РФ — пра страты ўкраінцаў
Высокадакладнымі ракетамі вялікай далёкасці марскога базавання нанесеныя ўдары па пункце дыслакацыі 383-га палка беспілотнікаў УСУ ў раёне горада Хмяльніцкі і складзе артылерыйскіх боепрыпасаў у той жа вобласці, заяўляе Мінабароны РФ.
На Купянскім напрамку за суткі знішчаныя да 70 украінскіх вайскоўцаў, дзве баявыя браніраваныя машыны, аўтамабіль і баявая машына РСЗА «Град».
На Чырвона-Ліманскім напрамку страты праціўніка склалі звыш 200 вайскоўцаў (забітымі і параненымі), баявая машына пяхоты, пяць баявых браніраваных машын, самаходная гаўбіца «Гваздзік» і гаўбіца Д-20.
На Данецкім напрамку за суткі знішчаныя да 250 украінскіх вайскоўцаў, тры баявыя браніраваныя машыны, шэсць аўтамабіляў, гаўбіцы Д-20 і Д-30, а таксама самаходная артылерыйская ўстаноўка Krab польскай вытворчасці. На Данеччыне знішчаная самаходная пускавая ўстаноўка ўкраінскага зенітнага ракетнага комплексу «Бук-М1». У гэтым жа рэгіёне, а таксама на Днепрапятроўшчыне знішчаныя дзве радыёлакацыйныя станцыі AN/TPQ-50 і AN/TPQ-36.
На Паўднёва-Данецкім і Запарожскім напрамках страты ўкраінцаў склалі да 70 вайскоўцаў (забітымі і параненымі), адзін танк, баявая машына пяхоты, дзве баявыя браніраваныя машыны, дзве гаўбіцы Д-30 і адна гаўбіца Д-20.
На Херсонскім напрамку за суткі знішчаныя да 15 украінскіх вайскоўцаў, пяць аўтамабіляў, самаходная гаўбіца «Акацыя», самаходная гаўбіца «Гваздзік», а таксама гаўбіца «Мста-Б».
Армейскай авіяцыяй, ракетнымі войскамі і артылерыяй за суткі нанесенае паражэнне 92 артылерыйскім падраздзяленням УСУ на агнявых пазіцыях, жывой сіле і тэхніцы ў 118 раёнах.
На Запарожжы і Данеччыне пабітыя два камандныя пункты.
Сродкамі супрацьпаветранай абароны за суткі знішчаныя шэсць украінскіх беспілотнікаў.
Разведка Вялікабрытаніі — пра паветраныя шары над Украінай
Разведка Вялікабрытаніі адзначае, што 15 лютага 2023 года ўкраінскія ўзброеныя сілы заўважылі над Кіевам некалькі аэрастатаў з падвешанымі пад імі радыёлакацыйнымі адбівальнікамі. Украінскія афіцыйныя асобы паведамілі, што яны збілі не менш за шэсць з іх. Раней, 12 лютага, ВПС Украіны паведамілі пра аэрастаты над горадам Дняпром.
На думку экспертаў, ёсць імавернасць, што паветраныя шары былі расійскімі. Магчыма, яны ўяўляюць сабой прыклад новай тактыкі Расіі, скіраванай на атрыманне інфармацыі пра ўкраінскія сістэмы СПА і прымус украінцаў да расходавання каштоўных запасаў ракет класа «зямля-паветра» і боепрыпасаў.
14 лютага 2023 года Малдова закрыла сваю паветраную прастору пасля выяўлення паветранага шара. Існуе рэальная магчымасць таго, што гэта быў расійскі паветраны шар, што дрэйфаваў з паветранай прасторы Украіны.
Інстытут па вывучэнні вайны: мэта Расіі — аварыйнае выключэнне ўкраінскіх АЭС
Кіраўнік Чачні Рамзан Кадыраў, падобна, адхіліў прапанову фінансіста групы Вагнера Яўгена Прыгожына далучыцца да новага вітка інфармацыйнай кампаніі супраць Мінабароны Расіі. Кадыраў заявіў, што чачэнскія фармірааванні будуць выконваць загады любога камандзіра, прызначанага Уладзімірам Пуціным, і што ў чачэнскіх баявых афіцэраў выдатныя і добра скаардынаваныя адносіны з Мінабароны. Раней Прыгожын заяўляў, што група Вагнера не падпарадкоўваецца МА і «не мае ніякага дачынення да расійскай арміі», адзначае ў сваім аглядзе Інстытут па вывучэнні вайны.
Таксама яго аналітыкі звяртаюць увагу, што расійскія навінавыя агрэгатары заклікаюць Расію наносіць «удары ў адказ» па інфраструктуры, якая падтрымлівае ўкраінскія атамныя электрастанцыі (АЭС). Мэта — прымусіць Украіну правесці аварыйнае адключэнне сваіх АЭС.
Мінабароны Расіі звольніла вайсковага прадстаўніка самаабвешчанай Данецкай Народнай Рэспублікі (ДНР) Эдуарда Басурына ў рамках фармальнай рэарганізацыі апалчэння ДНР пад кіраваннем Мінабароны. Гэта выклікала чарговую хвалю крытыкі з боку расійскіх блогераў што да расійскага абароннага істэблішменту.
Віцэ-прэзідэнт ЗША Камала Харыс заявіла 18 лютага, што ЗША пастанавілі: Расія здзейсніла злачынства супраць чалавечнасці ва Украіне.
Што да баявых дзеянняў, то расійскія сілы нанеслі яшчэ адзін ракетны ўдар па ўкраінскай інфраструктуры. Расіяне працягвалі наступальныя дзеянні на паўночны захад ад Сватава і ў раёне Крамянной, у раёне Бахмута, на заходняй ускраіне Данецка і на захадзе Данецкай вобласці. Яны працягваюць умацоўваць абарончыя пазіцыі ў акупаванай Запарожскай вобласці. Таксама расійскія ўлады працягваюць перабольшваць маштабы ўкраінскай пагрозы памежным рэгіёнам Расіі, спрабуючы пераканаць грамадскасць у «экзістэнцыйнай неабходнасці» вайны ва Украіне.
Пры гэтым украінскія афіцыйныя асобы працягваюць сумнявацца ў здольнасці расійскіх вайскоўцаў правесці буйнамаштабны наступ на тэрыторыі Данецкай вобласці.