У банкаў з’явіліся новаўвядзенні па грашовых пераводах. У адных вырасла камісія за такія паслугі, у іншых — знізілася. Ёсць і іншыя змяненні па пераводах.
«ВТБ Банк» з 24 красавіка падыме тарыфы за пераводы з рахункаў фізічных асоб у іншыя банкі — як беларускія, так і замежныя. У айчынныя фінустановы камісія будзе 2% ад сумы, у замежныя — 2,5%. Змяненні закрануць пераводы ў беларускіх рублях, далярах, еўра і юанях, а ў расійскіх рублях — не.
З 1 красавіка «Тэхнабанк» змяніў камісію для фізічных асоб за пераводы за межы банка ў далярах. З гэтай даты яна складае 30 даляраў і 1% ад сумы. Але збор не можа быць большы за 350 даляраў.
«БСБ-Банк» пашырыў спіс валют, якія можна адправіць праз яго сэрвіс пераводаў з карткі на картку. Цяпер гэта не толькі беларускія рублі, але таксама даляры і еўра. Ліміты на адзін перавод — 2000 рублёў, 500 даляраў ці еўра.
«Альфа-Банк» з 1 красавіка ўвёў плату за тое, што будзе адпраўляць заявы кліента-платніка на вяртанне памылковых пераводаў грошай. Збор — 20 рублёў за адзін такі зварот.
«Сбер Банк (Беларусь)» знізіў камісію па некаторых пераводах у кітайскіх юанях, а таксама ў індыйскіх рупіях.
«Неа Банк Азія» змяніў камісію па міжнародных грашовых адпраўленнях. Калі гаворка пра пераводы сродкаў у амерыканскай валюце, то цяпер збор складае 50 даляраў і 1,3% ад сумы (але не больш за 330 даляраў), а калі ў казахстанскіх тэнге, то 0,5% (мінімум 25 даляраў, максімум — 150).
«Альфа-Банк» увёў магчымасць пераводу з адной карткі на іншую праз спецыяльную вэб-праграму (патрабуецца ўваход у акаўнт карыстальніка). Удакладняецца, што яна даступная не толькі кліентам гэтага банка.
Чытайце таксама
